Kaleak betetzera atera behar gara, administrazioei eskatzeko pertsonei —eta ez enpresei— krisitik ateratzen laguntzeko.

Amaitu berri den urtea nabarmendu egin da COVID-19ak eragindako osasun-krisiaren inpaktuarengatik. Krisi honek ziurgabetasuna eragin du mundu osoan, etorkizun hurbilean biziko ditugun baldintzen inguruan.

Osasun-krisiak aldaketa handiak eragin ditu gure bizitzako esparru guztietan (ekonomikoak, sozialak, politikoak, pertsonalak, etab.), eta argi eta garbi erakutsi du kapitalismoa eta bizitza bateraezinak direla. Ezin dugu ahaztu Arantxa Tapia lan sailburuak, konfinamendu garairik gogorrenetan, lan egiteko beharra defendatzen zuela.

Eragina lanan eta ekonomian

Ezin bestela izan, pandemiak eragin izugarria izan du lanaren eta ekonomiaren arloan ere. Espainiako Estatuak BPGaren %12,8ko atzerakada ekonomikoa izango du (Europar Batasuneko handiena). Langabezia-tasa 3 puntu inguru igoko da, eta urte amaieran %16tik gorakoa izango da.

Egoera honen aurrean, kapitalak irtenbide bat bilatuko dio krisialdi honi; enpresa-etekinen eta gure lan- zein bizi-baldintzen prekarizazioaren defentsan sakonduko du.

Pertsonei laguntza, ez enpresei

Ez dugu utzi behar pandemiaren hasieratik interpelatzen gaituzten sirena kantuek engainatu gaitzaten, krisialditik irteteko lagundu dezagun eta gure asmoak baztertu ditzagun esaten dutenak, alegia. Ez da antzeko zerbait entzuten dugun lehen aldia. Mezu bera zabaldu zuten duela hamarkada bat pasatxo, finantza-krisi betean, eta, azkenean, 60.000 milioi euro publiko baino gehiago bideratu zituzten bankuak erreskatatzeko; aldi berean, milioika pertsonak murriztu egin zituzten beren lan-baldintzak, pentsioak eta gizarte-babeseko sistema.

Testuinguru honen aurrean, langileok gai izan behar dugu pandemia gainetik kentzeko. Beharrezkoa da erakundeetatik zabaltzen ari diren beldur mezuak, guztiok etxean geratzeko dioenak, blaitu gaitzan ez uztea.

Horregatik, kaleak betetzera atera behar gara, administrazioei eskatzeko politikak bila ditzatela pertsonei —eta ez enpresei— krisitik ateratzen laguntzeko. Premiazkoa da kaleak betetzea, oihukatzeko krisi honi irtenbide bat eman behar zaiola, eta enpresen etekinen gainetik jarri behar dela bizitza.

'Matxinada'