Enviserreko langileak greba mugagabera atera dira, lan-baldintza eskasak hobetuko dituen hitzarmen propioa eskatzeko, eta greba honek aurrera jarraituko du baldintzetan hobekuntza garrantzitsuak lortu arte.

« Baldintza txarrak langileentzat, mozkinak enpresaren jabe den  estatubatuar inbertsio funtsarentzat  »

Gaur goizean hasi da Enviserreko enpresa-batzorde osoak (ELA, ESK eta LAB osatuta) deitutako greba mugagabea. Enviser Gasteizko Udalaren kontratak parkeak eta lorategiak eta hiriko eraztun berdea mantentzen ditu.

Guztira, 90 langile daude grebara deituta. Grebaren jarraipena %90 ingurukoa izan da, eta enpresan bi aste eta erdiko antzinatasuna duten langileak eta enpresako arduradunak baino ez dira lanean hasi. Jarduera erabat geldituta dago.

2 urte langileei jaramonik egin gabe

Haien lan-baldintzak oso prekarioak dira, LGSra ozta-ozta iristen diren soldatekin eta lanaldi amaigabeekin. Enviserreko langileak lan bera egiten duten udal-langileek baino 10.000€ gutxiago kobratzen dute eta 100 ordu gehiago egiten dituzte urtean.

Egoera hori udal-gobernuek sustatutako azpikontratazio-sistema nazkagarriaren ondorioa da, AEBetako inbertsio-funts bat, enpresaren jabea, aberasten baitu, langileen erabateko prekarietatearen kontura.

Azken hilabeteetan, enpresa-batzordea, beti langileen batzarrak lagunduta, hitzarmen propio baten negoziazioa aktibatzen saiatu da, enpresako zuzendaritzarekin dituen lan-baldintzak funtsean arautu eta hobetzeko. Zuzendaritzak uko egin dio horri, eta astelehen honetan bilera bat egin zen, ordubete eskasekoa. Bertan, enpresa-batzordeari greba erretiratzeko eskatu zion, bileren egutegi bat adostearen truke, mahai gainean lan-hobekuntzako edukirik jarri gabe. Bi urte ingururen ostean, benetako adarjotzea, langileen bidezko aldarrikapenei erantzunik eman gabe.

«  Udaltzaingoaren eraso onartezina  salatzen dugu gaur goizean egindako elkarretaratzean »

Polizia bitartekaritzaren ordez

Duela bi aste, Espazio Publiko eta Auzoetako Saileko zinegotzi delegatua Beatriz Artolazabalek konpromisoa hartu zuen Enviser kontrataren eta langileen artean bitartekari lanak egiteko, enpresa-batzordeko kideek hitza hartu ondoren Espazio Publikoko batzordean. Gaur, bi aste geroago, langileek elkarretaratzea egin dute Batzordearen beste bilera bat egiten ari den bitartean, Gobernuaren eta zinegotzi delegatuaren gelditasunaren aurrean.

ELA, ESK eta LAB sindikatuok, gainera, Udaltzaingoaren jarrera onartezina salatu nahi dugu gaur goizean enpresaren kanpoaldean egindako elkarretaratzean, lan-baldintza duinak aldarrikatzen zituztenei fisikoki eraso egin dietelako. Udaltzaingoa grebalariei erasotzera bidaltzea bada Udalak gatazkari ematen dion irtenbidea, hain jokabidea larria erabiltzen duten erantzuleak seinalatzea beste erremediorik ez dugu izango.

Atzo arratsaldean egindako batzar jendetsu batean, langileek mobilizazio egutegi zabal bat adostu zuten, enpresaren eta Udalaren aurrean, beraien lan-egoera onartezina irudikatzeko, azken hori baita egungo egoeraren erantzule nagusia, eta ez dira geldituko lan-baldintzak nabarmen hobetuko dituen hitzarmen propio bat lortu arte.