Errenteriako Sanmarkosene egoitzan 81 eguneko greba egin ostean, kaleratzeak geldiarazteko eta, oro har, langileen lan-baldintzak hobetzeko akordioa lortu da.

« Enpresak  erizaintzako laguntzaileen  lan-baldintzak nabarmen okertu  zituen »

Gureak elkarteak kudeatzen duen Errenteriako Sanmarkosene egoitzan 81 eguneko greba egin ondoren, greba amaitzeko akordioa lortu da, batzarrean onartu ondoren.

Enpresak nabarmen okertu zituen erizaintzako laguntzaileen lan-baldintzak, lan-baldintzen funtsezko aldaketa inposatuz. Hasiera batean, egutegiak okerrera egitea, lanaldi-murrizketak eta kaleratzeak planteatzen zituzten.

Greba ondoreko akordioa

Planteamendu horien aurrean, langileek mobilizazioei eta greba-egunei ekin zieten, eta greba mugagabeari hasiera eman zioten 2024ko azaroaren 25ean. Greba hori 2025eko otsailaren 11n amaitu zen, honako akordio honekin:

• Ez da kaleratzerik egongo
  
  
• Lanaldi partziala duten langileek aurten eutsi ahal izango diote beren lanaldiari, eta datorren urtean %60ko kontratuetatik %81etik gorako lanaldia bermatuta duten kontratuetara igaro ahal izango dute.
  
  
• Egutegiari dagokionez, ESK-k hainbat aspektu baloratzen ditu. Alde batetik, egia da aldez aurretik gehienez 4 egun jarraian lan egiten zirela eguneko txandan, eta 2 gauez. Orain, batzuetan, eguneko 5 edo 6 egun eta gaueko 3 egun jarraian lan egiten dira, eta, gainera, ez da lehen bezain ekitatiboa, rotazioa ez dagoelako. Bestalde, eguneko txandetan erizaintzako laguntzaile gehiagok lan egingo duten egutegia egin da, eta, txanden iraupen berria dela eta (gutxienez 7 ordu), hasiera batean lan-kargak murriztuko dira eta librantza-egunak handituko dira urtean zehar.

Gainean egongo gara gutxieneko plantilla hori bete dadin eta onura komun hori egunerokoan benetakoa izan dadin. Baldintza horri eusten badiogu, posible izango da lan-kargak murriztea eta erabiltzaileei ematen zaien eguneroko arretan zerbitzu hobea bermatzea.

«  Eskerrik asko  borroka luze honetan lagundu diguten pentsiodunei, senideei eta gainerako gizarte-eragileei »

Greba eta elkartasuna

Hori guztia ez zen posible izango langileek egunerokoan egin duten borrokarik gabe. ELAk, LABek eta ESK-k sinatutako akordioa lortzeko bide bakarra greba izan da.

Azkenik, eskerrak eman nahi dizkiegu borroka luze honetan lagundu diguten pentsiodunei, senideei eta gainerako gizarte-eragileei.